Yanditswe na Dushimimana Elias
Ku wa Gatatu tariki ya 17 Nzeri 2025, Nibwo i Kigali hasojwe amahugurwa y’amezi atatu yateguwe n’Umuryango w’urubyiruko uharanira iterambere ridaheza (TICO), aho hatoranyijwe imishinga 40, itanu ya mbere, uhize iyindi agahabwa ibihembo birimo miliyoni imwe y’amafaranga y’u Rwanda.
Bamwe mu rubyiruko rwitabiriye aya mahugurwa y’amezi atatu, bagaragaza ko TICO yabagiriye neza bitewe nuko bayungukiyemo byinshi bitewe nuko amasomo baherewemo yabafashije kwagura ibitekerezo byabo ndetse ku bijyanye no kwihangira imirimo bigiyemo ko gukora umushinga ukanashyirwa mu bikorwa bidasaba igishoro cyinshi.
Saleh Ahishakiye ufite Kompanyi yitwa Triple T Processing Agency yongerera agaciro inanasi zikavanywamo umuvinyo ndetse n’amafu y’igikoma yongewemo amagi kugirango agabanye imirire mibi y’abana, yabwiye itangazamakuru ko yungukiyemo byinshi bijyanye no kunoza imishinga yabo ndetse ko bigishijwe uko bakorana nabashoramari batandukanye.
Agira ati” TICO ni umubyeyi kuko yadufashije byinshi, kwaguka mu bitekerezo bitewe nuko aya mahugurwa twayungukiyemo byinshi bijyanye no kunoza imishinga, kumenya uko twakorana n’abashoramari binyuze mu bikorwa cyangwa imishinga yacu ndetse twigishijwe uko twakwitwara ku isoko ry’umurimo”.
Isimbi Karo, ufite umushinga watoranyijwe nk’uwahize indi ugahabwa igihembo cya 1,000,000 Frw.
Ati “TICO yampaye amahirwe yo guhagarara imbere y’abantu no gutekereza cyane, byagura ibitekerezo byanjye. Umushinga wanjye waremewe, uratoranywa ndetse uhiga indi ku buryo nahembwe Milioni 1 Frw, amafaranga ngiye kubyaza umusaruro mu bikorwa byanjye.
Twungukiyemo byinshi kuko hari imbigamizi nagiraga mbere, z’uko nakundaga kugira ibitekerezo ariko kubishyira mu bikorwa bikananira, nanafashijwe uko nasobanurira imbaga nyamwinshi ibyerekeranye umushinga wanjye kuko mbere nabaga mfite ubwoba ikindi aya mahugurwa tuyahuriramo n’abandi baturutse mu bindi bihugu badutera inkunga”.
Habinshuti Égide, Umuyobozi Mukuru wa TICO itegurauye aya mahugurwa yavuze ko urubyiruko rwahuguwe ruzakomezwa gukurikiranwa, runahuzwe n’abashoramari ndetse anaboneraho kubasaba kuzegera bagenzi babo batahuguwe bakabigisha.
Ati” Nibyo twarabahuguye nkuko bisanzwe ariko ntibirangirira mu mahugurwa bahawe kuko tuzakomeza kubakurikirana, nihaboneka amafaranga yabafasha kwagura imishinga yabo tuyabahe ndetse dukomeze tubashakire abafatanyabikorw, abashoramari bakorana mu mishinga yabo.Ikindi turabasaba kuticara ngo binumire, begere bagenzi babo babigishe, babasobanurire bijyanye n’icyo bayigishirijwemo”.
Umuyobozi ushinzwe Imyigishirize n’Iterambere ry’Abakozi bo kwa Muganga muri Minisiteri y’Ubuzima Dr. Nkeshimana Menelas yavuze ko urubyiruko rurimo ureahuguriwe aha rukwiye gukoresha amahirwe yo kuba mu gihugu gifite icyizere cyo kubaho ndetse nagupfusha igihe ubusa.
Ati “Afurika n’u Rwanda bigizwe n’urubyiruko rwinshi tugomba kubashoramo imbaraga zose zishoboka. Mu rwego rw’ubuzima icyizere cyo kubaho ni imyaka 70 ariko icyo dukwiye kwitaho ni icyo dukora muri iyo myaka kandi tukagikora kare kuko imbaraga z’urubyiruko zigira aho zirangirira, Yaba aba bahuguwe n’abandi muri rusange mukwiye kubyaza umusaruro igihe mufite ntakugipfusha ubusa ugashyira imbaraga mu buto bwawe”.
Urubyiruko rwitabiriye amahugurwa ruturutse mu bice bitandukanye mu gihugu rukubiye mu byiciro bitatu birimo Ubuhinzi, Digital na Arts, hakaba harahembwr imishinga itanu ya mbere aho uwa mbere wahawe miliyoni 1 Frw indi ihabwa ibindi bihembo.
About the Author
